Maneno ya Shiza Kichuya kuelekea mechi ya Simba dhidi ya Mbao FC..




Winga wa Simba, Shiza Kichuya, amepania kuweka rekodi ya kuwa mchezaji wa kwanza kufunga ‘hat-trick’ leo kwenye mchezo wa Ligi Kuu ya Vodacom Tanzania Bara dhidi ya Mbao FC, utakaopigwa Uwanja wa Uhuru jijini Dar es Salaam.

Kichuya ambaye amesajiliwa msimu huu akitokea Mtibwa Sugar, ameibuka kuwa kipenzi cha mashabiki na viongozi wa Simba kutokana na kiwango alichokionyesha hadi sasa akiwa na klabu hiyo ya Msimbazi.

Tangu aanze kuitumikia Simba katika mechi zake za VPL, ameifungia timu hiyo mabao saba kati ya 17 ambayo wamefunga kwenye mechi nane za msimu huu na kuongoza orodha ya wafungaji kwenye ligi kuu.

Mbali na kuongoza kwa kucheka na nyavu, Kichuya pia amepiga pasi za mwisho tano ambapo ukijumlisha na mabao saba aliyofunga ina maana amechangia kupatikana kwa mabao 12 kati ya 17 yaliyofungwa na Simba msimu huu.

Idadi hiyo ya Kichuya ya mabao ni sawa na asilimia 71 ya mabao yote ya Simba waliyofunga msimu huu na hivyo kuonekana ni moja ya wachezaji muhimu kwa miamba hiyo ya Msimbazi.

Akizungumza na gazeti la michezo la Bingwa jana, Kichuya alisema ana uhakika mkubwa wa kufunga ‘hat-trick’ leo kutokana na maandalizi mazito waliyoyafanya wachezaji wa timu hiyo na benchi la ufundi linaloongozwa na Joseph Omog.

“Uwezo wa kufunga hat-trick leo ninao, si kwa sababu tunacheza na timu dhaifu ndio nitambe hapana, huu ni mpango wangu ambao nimeupanga na ninataka kuutimiza leo,” alisema Kichuya.

Simba inaingia uwanjani leo ikiwa imepania kuzidi kuongeza pengo la pointi kati yake na wapinzani wao na ndiyo maana imepania kuibuka na ushindi kwenye mechi yao ya leo dhidi ya Mbao FC.

Simba watakuwa wenyeji wa mchezo huo utakaochezwa Uwanja wa Uhuru jijini Dar es Salaam, ambapo kama Wekundu hao wa Msimbazi watashinda watafikisha michezo 10 msimu huu bila kupoteza.

Kikosi hicho ambacho kipo chini ya kocha Mcameron, Joseph Omog, kimeshinda mechi saba na kutoka sare mara mbili na hivyo kuongoza ligi hiyo wakiwa na pointi 23 kibindoni.

Wekundu hao wa Msimbazi ambao msimu huu wamekuja na kaulimbiu inayosema kila mchezo kwao ni fainali, itaingia uwanjani huku ikihitaji pointi tatu muhimu kutoka kwa Mbao FC ili iweze kuendelea kujichimbia kileleni mwa msimamo wa ligi hiyo.

Simba wanaonyesha kuwa na uchu wa kupata ushindi katika kila mechi ili kutimiza lengo lao la kutwaa ubingwa msimu huu, huku wakitoka kupata ushindi wa mabao 2-0 kutoka kwa Kagera Sugar mchezo uliochezwa Uwanja wa Uhuru, Dar es Salaam.

Kwa upande wa Mbao FC iliyopanda daraja msimu huu, itaingia kumkabili Mnyama huku ikiwa imetoka katika machungu ya kutandikwa 3-1 na Toto Africans.

Katika msimamo wa ligi, Mbao FC inashika nafasi ya sita ikiwa na pointi 12 baada ya kucheza mechi 10 ambayo iliweza kushinda mitatu, sare mitatu huku ikiruhusu kufungwa michezo minne.
Post a Comment
Powered by Blogger.